Президентин иш башкармалыгына караштуу "Кызмат" мамлекеттик мекемеси шайлоолорго техникалык оператор болуп аныкталды. Шайлоо жана референдум өткөрүү боюнча борбордук комиссиянын тиешелүү токтому "Эркин-Тоо" гезитине жарыяланды.

Документке ылайык, "Кызмат" ишканасына төмөнкү милдеттер жүктөлдү:

шайлоо жана референдумдарды өткөрүүгө керектүү автоматташтырылган маалыматтык системаларды иштеп чыгуу, техникалык тейлөө жана жаңыртуу;

шайлоочулардын алдын ала тизмесин түзүп, бирдиктүү каттоо системасына жүктөө;

шайлоочулар боюнча маалыматтарды Калктын мамлекеттик жарандык реестрине таянып убагында жаңыртып туруу;

шайлоочуларды идентификациялоочу жабдууларды даярдоо жана кийинчерээк БШКга өткөрүп берүү.

Эскерте кетсек, 25-сентябрда Жогорку Кеңеш өзүн-өзү таркатуу боюнча токтом кабыл алып, алдын ала маалымат боюнча, кезексиз парламенттик шайлоо 30-ноябрда өтөрү айтылды.